Pianna: Pa Tun Cin Thang & Nu Goih Zam, Gualnam sung pan
AD.1947 January 18 in Lailo khua ah suak hi.
Unau: Pasal 4 leh 4 lak ah pasal lam ah nautum Innluahpa hi.
Sangkahna: Lailo ah Sang omta ahihmanin Tan 4 ciang ong hi. Tedim Sang ah Tan 5 pan Tan 8 dong zo hi. 1964 kum in a U Vungh Khan Thang leh Khai Thawng pen Pu Thual Zen galkap alut ciangin Inn tavuan la in om hi.
Khualzinna: Sakol neih sun 3 tawh Sumthalawh in zin kawikawi hi. Pasian in Thupha pia in Khawi leh vulh, Bawng, Vok, Ak, Sakol cihte zong neithei mahmah hi. U Khai Khua Pau & U Cin Hau in khualcin sumzonna ah makaihin a pantah uhi. Amaute gel tung ah lungdamna genzawhloh in om hi.
Sanggamte ahuhna: A Ute sitni lakna ding Sum kisam ahihman in a setlu khat leh Sakol khat zuak in Sitni cial sak a, Sitnite in zawhsak in 1967 November Ni 7 in Thong pan suakta in Nu leh Pa kiang Inn hong tung uhi. Ute hong ciah ciang in gawh ding ci-in akhawikhawi uh Vok tuk 6 khat go in U-le-nau Pawlpi teng sam in Lungdamna neihpih uhi.
Sawbua tuna: Sanggamte tunzawh asawtlo in apa Tun Cin thang in “Ka Tate na kikhentaang ma un, Kawlgam ah hong paipih nuam ing” ci-a, hong kuppih ciang in Vekpi thukimna tawh Kalaymyone Sawbuayishin Khua ah taai ding in Innkuan teng letmat thuh in thukimna neihpih hi.
U Vungh Khan Thang in amasa in Mun leh Gam va vaan in Sawbuayishin, Tuikhaal dong ah gam va en a, Lingmaw hoih lai ahihman in Lungkim mahmah in hong ciahto a, paipah ding kisawm hi. Sakol omlai teng leh van neih teng kizuak in 1968 February 28 in Motor khat bupsap in Lailo pan Sawbuayishin ka pai ni mah un ka tungsuak pah uhi.
Sawbua ka tunciangun Sawbua Tuiphum Pawlpi in hong muak uh-a, Khuazangbup in Innding Bii hong zonpih pah uh a, tomno sung in Inn tung kum ding kicing ka ngah pah uhi. Inn lam zawh kum 1 khitciangin Motor lamdung aa Compounder Pu Thang Khua Dai Inn pen 55 in lei in tua mun ah ka kituah uhi. 1971 in a Ute Inntuan uhi. Innpi pen U Zam Za Do in ngaak hi.
U Vungh Khan Thang in Thusuak ngah sak: Hun khat ciangin Inn Huang sung ah Biak Inn kilam ding hi ci hi. Asawtlo in SDA Pawlpi in Effort hong bawl in lawhcing mahmah uh-a, Inn 6 ngah in Pawlpi hong dingpah uhi.
Kum 10 khit ciangin Ahuang lang khat pen AG Pawlpi in lei in Biak Inn hoih mahmah khat hong kilam takpi hi. Tuaciangin U V.K.Thang thusuak tangtung takpi hi.
Suangkhuk paina: 1985 pawl in Phakant Suangkhuk ah pai in na va sem hi. Tualai mun ah Sum lawhcing mahmah na pi in Thang Khan Kam in a suanglei na khem in asawtciang na taipi mang ahihmanin bangmahlo tawh Inn hong tungkik hi.
A pa nusiatna: Pa Tun Cin Thang in 1987 January in nusia hi.
Tuikhing taina: 1992 in Tuikhingzang ah a unaute tawh pai hi.
FBBC Lai Siangtho Sangkahna:
1992 kum pan Tedim FBBC Lai Siangtho Sangkah kipan in Kum 4 sung 1995 dong vakah a, BABS hong ngah hi.
Missionary: EBC Pawlpi sung ah Sia sem ding in kideihpah hinapi, a pawlpi omna BCJC in Mission Sia ding in adeihna na pulak masa ahihmanin Minldong Township, Minlah Village pekpek paun limtak asilh nai mello Asho Chin Sanggamte lak ah 1996 pan 2002 dong Kum 6 sung tawntung Minlah ah missionary nasep vasem in 2002 March kha Khampat No. 4, Assembly ah Pastor kipia hi.
Khampat No.4 aa Kawlgambup Assembly Khawmpi manciangin a nasepna ah paikik pah vingveng a, 2009 kum pan Khamtung gam lam ah om ding angetleh ngah a, 2005 kum in Tuikhingzang pan avanteng laksak in Zonuamzang ah a U Khai Thawng kiang ah kikoih sak hi.
Hongciah ciangin Zonuamzang mah hong ciahto suakpah in amah pen Free Evangelist ding in Tedim, Tonzang, Kalaymyone leh Tamu Myone sung ah vakkawn Sia ding in kisawl in Khasum cing mah tawh kum 1 sung nasep kipanpih hi.
Minlah ah nasep lawhcinna: Mission kum tampi sung asep sungin Gupna thugenna, Pawlpi makaihna cihte bulphuhin aomlaitak khat vei, Pawlpimite khat in alokhawhna ah mang lamdang khat man a, “Hih lai mun na khawhlai uhleh Kum 1 mi khat ta si ding cih mangman hi. Tua thu hangin Behiang adim in a ciin uh pen la ngamnawnlo uhi.
Pasian ompihna: Thupiangte theisaklo in Siapa apiakciangun lungdam in sangpah hi. Anlak ding acial hangin kuamah kuan nuamlo ahihmanin lamdangsa hi. Limtak engige uh-a, asihlohciangin lamdang sa in zahtak mahmah pan uhi.
Pawlpi khanna: Hausapa Christian suak pah a, Sa amatsial un aliang khat puakpah ngelhngelh uhi. Pasian nasep lawhcihna lianpi suak pah hi.
Free Evangelist: Mission nasepna amabante ah Khamangthang amat hang, Kum 1 nasepna ah Pawlpi phuh neizolo cih kipaulam ahihman in Free Evangelist pan 2010 in kikhawlsak hi.
2011 in Ks.30000 tawh Innmun hoih khat lei in Zi neinailo ahihhang, Zineih ding deihsakna tawh Inn kituan sak in Innthak khat neipah hi.
2012 ciang in a U Rev. Khai Thawng Innkuan tawh BCJC pan ZBCM Pawlpi ah lut uhi.
2013 Kum in ZBCM Pawlpi in Mission sem ding in Mualnuam ‘D’, Tedim Tsp ah kikoih hi. mundang aa semte Ks.50000 bek pia na pi, amah Kum khat term pen Kha sum 80000 pia hi.
2014 kum sung in nasep tawlnga in Inn lam ah nuamtak in omkik ta hi.
2015 kum Lokaih hun July kha sungin Tuikhan lauhuaina Zonuamzang Logam pan suakta hi.
No comments:
Post a Comment