Pianna:
Lailo Khua, Tedim Tsp 15th
August, 1945
Pa
Min: Tun Cin Thang (Gualnam,
Songlam)
Nu
Min: Dam Khua Ciang (Gualnam, Kipgawt)
Unau
Sanggamte: Pasal 4 & Numei 5 sung ah a 4na hi.
1.
Vung Khenh Cing + En Cin Zam, Naulak (Khual Vungh,
Gawng Mual Khua)
2.
Cin Suan (The 2nd Chin Battalion Galkap sung
pan hong ciah nawnlo!)
3.
Vungh Khan Thang + Dim Khan Zo, Gualnam (Vungh Khua
Thang, Tualzang Khua)
4.
Khai Thawng + Niing Ngaih Vung, Buansing (Khup Dongh,
Lailo Khua)
5.
Zam Za Do
6.
Lian Ngaih Cing + Gin Vum, Gualnam (..., Tualzang Khua)
7.
Awi Za Niing ( A nungaklai in si)
8.
Khai Khan Dim + Thuam Za Cin, Suante ( Ngul Khua Thang,
Lunmual)
9.
Dim Ngaih Langh + Siing Tuah Hau, Gualnam (Pum Khua
Suan, Teklui)
Sangkahna:
Lailo ah Sang om nailo ahihman in Tanlang pan kipan in
Tedim Suangsan Inn ah
Tan 4 a ondong mah kahsuak a, 1960 in Sakollam ah Sangpi
hong kihon ciang in
Tan 8 ciang ong in Kum 19 bang ka phata hi.
Gam
leh nam adingin mapannate:
AD.1962 Kum in Kawlgam Democracy ki ukna pan U Ni Win in galkap
ki-ukna tawh alakban ah Pinlong Thukhun palsat in nasepna tampi aneihciangin
mipite tung ah haksatna tampi atunsak, Mipite neihsa khempeuh laksak in Kumpi
neihsa asuahsakciang gam sung ah buaina, haksatna tampi piang a, tua
lungkimlohna hang in Sangkah laitak kimlai lawm-le-gualte tawh Politics lam ah
kiheina thak khat hong neisak hi.
AD.1964 in Kumpi lam pan palaite tawh Suangkua kilepna ah
zong ka kihel hi.
Pu
Thual Zen in Galkap khawm a, Mi 1000 bang ngahpah in Battalion 3 asuahsung ah
Dampi gam, Tuisanzang Camp ah Kha 2 sung Galkap Training ka manciang, India gam
Laili Phai ah Signal Training kha 1 sung sinkik ka zawhciang Tuisanzang Camp
mah ah ciah kik in: Datmei tang 3 thun tawh Signal Message kikhaak inTedim pan
Tuisan, Tuisan pan Tonsim, Tuithang pan Tonsim, Tonsim pan Lamka cihbangin
Nitak khat, Nai khat sung in Lamka dong ka kiho khin ziauziau thei uhi.
Nitak khat Lamka pan Message hong pai a, Dam Khua Hau,
Thual Zen, Hrang Nawl, Son Cin Lian hong tung ding cih message ka ngah uh-a,
azingciang ka dawn uhleh hong tung takpi hi. Camp hong tunciangun, Ih Signalte
Laivuanna hong neisak in hong Test uhi. P{awl khat mual tung ah kah sak in Pawl
khat Camp ah om sak hi. Ka kihonading uh pen hongh theisaklo uhi. Mun khat tuak
pan Uliante in hong encik hi. Thudot ding pen amau hoihsak ageelsate mah hong
kiho sak hi. Ka kihona uh manlangtak kisangthei pahpah ka hihmanun Makaite nuam
mahmah uhi.
Gam leh nam adingin nasia tak panla in ka omlaitak un, Bok
khat angah thak Khai Thawng Signal pawl in Tedim pan Message hong paipah in,
"Zingciang Palik leh Galkap kithuah in Sitciang Tongciang tawh ummcih in
hong kikaap ding hi" cih ka ngahciang un, ka kiheemkhiapah uhi.
Kiheem man ka hihman un hong kaapcip khalo uh-a, Palik Bo
Cung Ling pawl in Zampi khua pan hong man uhi. Tua pan Tonzang hong puak uh a,
Innpipa in zong "Na mimatteng uh Zuluup nuam ing" ci-in dintan bang
apha, Sai Beel tawh Zu hong luup hi napi, Palik Bupa leh amitengin ne mangin
hong pialo uhi. Azan in Motor tawh Tedim hong paipih suak hi. Tedim pan
galkapte tawh kop in Kawlpi dong Galkap Motor 15 tawh hong paipih suak in
lamkal pen laulua mahmah uh ahihman un an hong nesaklo liang in hong paipih
uh-a, ahizongin lamkal ah bangmah kituaklo in Kalaymyo 42 Battalion ah hong
puaksuak uhi. Galkapte pen Kawlpi ka tunciangun zong lau mahmah lai uhi.
Kawlpi Battalion sung ah Mualpite galkap San 3 khat in
"Lawmte aw, Hoih tak om un la, galkapte in bangmah hong cihlohna ding in
ke'n tavuan la ding hi ing , Zunsuak, Eksuak na om uhleh hong gen un, Na
haksatna uh hong panpih ding hi-ing" hong ci a, an zong hong vaaklai hi. Tua pan asawtlo in
Kalaywa Thong neu akigaak mahmah ah hong khum uhi. A zingsang ciangin Monywa
thong ah direct hong puak suk leuleu uhi.
Hong mat khempeuh mimal 25 in Monywa Thong ah Kum 1 ka
cinciang un Thu hong kisit pan a, kum 2na ciangin Sitni cialthei ding
acihciangun Innlam pan Sitni hong kilaksakte hong tunciang, 17 (a) & 17 (b)
Letnetmuh leh tapongmuh tawh hong man hi-a, Ko letnet neikei ung, kacih
ciangun, Temtawng bek ka neihna uh Palikte genna tawh kituak in a thu ka zo
uhi. Insein pan hong tung Thongkiate in thupiangte aphawkciangun Politics vai a
Thongkiate pen hibangin kibawlding thumanlo hi hongcihciangun Ni 7 sung anngawl
in Sandahpiah in ka omkhitciangun Thongcingte in tungsiah ah thupuak uh a, tua
akipan Pohmah 5 te anneek bangmah hong kipia pan hi. Ni khat in Ks.5 man
zatkhuan kingah pan hi. Amasa in Buhhum leh Suangtang kihelzau an hong kipiakna
pan Buhlim leh Mehlim akingahna hipan hi. Kum 3 leh alang Thongkiat sung ah Kum
2 bang neek le-dawn haksatna khitciang ka ngah khak uh ahipan hi. Amuh dang
khat pen kum 2 cingta zong kizo khin hi. Amuhdang khat Tapongmuh pen sitnite in
hongzawhsak ciangun Kum 3 leh alang hong cingto in suahtakna hong kipia hi.
Lailo
pan Sawbua Tunna:
1968 February 28 in Lailo pan paikhia in Sawbuayishin Khua
ka tung uhi. Lokhawhna gam ahihmahbangin Lawilo Eka 8 pen Ks.1000 in ka lei
uh-a,
Kum
sim in An taang 300 leh Taang 400 kikaal kila den ahihmanin ankhing kikham hi.
Zineihna:
1969 November 30 in ah Lailo khuami mah
Pa Khup Dongh leh Nu Ging Zen Cing tanu ubel Lia Niing Ngaih Vung tawh Lailo
Baptist Church ah Rev. Cin Pau in Siangtho kiteenna hong letthat hi.
Inntuanna:
1971 in Inntuan in Sawbua ah Innthak ka nei uh-a, tua kum sung mah in tapa
Thang Sian Mung ka neipah uhi.
Si-leh-Hing
kikhenna: May 7 in Ka U Cin Suan pen Si leh Hing kitheilo in Taimang hi
cih Message hong kikhak hi. May 10, 1971 in Ka Nu Dam Khua Ciang in hong nusia
leuleu hi. U Suan' Thu akandingin Lawi 2 zuak in Yangon aa Galkap Piankyazi
Zumpi ah ka kanciang un "Tapong sung aa lut in gen ahihman un avan zong
hong kipialo, a pension zong hong kibawlsaklo in, si leh hing kitheilo, a omna
kitello in hong gen uhi." Hih thu kazakciang un Sawbuayishin ah Zongeina tawh
kivuibawl hi.
Gupngah
kitelcianna: 1974 March kha sung in TBA Sivuaipi Theizang khua ah Sia
Hau Lian Kham Thuhilhna tungtawn in Gupngah kitelcianna (or) Pianthakna ka ngah
khitciangin 1976 in Taungkyi ah Lai Siangtho Sangkah ding ka sawm a, Sawbuayishin
Tuiphum Pawlpi Upa Ngul Za Kam in "Hipa pen Piangthak mi hi. Sang ikahsak
hangin Ei sung ah semkiat!" cih tawh hong kikankuat in hong kikah saklo
hi. Tua Kum mah in Pentecostal Upna nei takpi ka hihman in Pawlpi sung pan
Limsangte cih tawh hong kihawlkhia hi. Ahizongin Pianthakna Thu amaukiang ah
gennuam in 1983 dong Pawlpi taisanlo in ka kikhawm tentan veve hi.
1978 Kum in Ka ihmutkal in Samuel akisap mahbang in ka min
tawh hong kisam ngei hi. Thokhia in ka paikhiatciangin Ka U Vungh Khan Thang in
thu na gengen a, hih Ka thugenna aza, angai na om uhleh na lupna tung pan un
tho in na ki-aap dih un Pasian in hong deih hi, ...cihna ka za hi cihthu
Zingsang nai 2 pawl in ataangko laitak
aza ka hihi. Kei zong ka zak aw, bang in ka ki-aap khitciangin ka lumkik hi.
Revival
hong tunna: 1984 Kum in Revival hong tung in AG Pawlpi ah ka kihelsuak
ta hi. Tuikhal ah AG Khawmpi tung a, Topa hong lah Vision pawlkhat in:
"Guahzuk cihtak hongzusuk in Mandat tung ah guah zu ziahziah hong musak
hi. Atatak in lah zulo a, tua pen Kha Thupha na himawk hi. Tua sung mah in
1. Kamtuampau
ka ngah a,
2. Salan
Late sa in
3. Kamtuam
Pau akhiatna gentheihna zong ka ngah hi.
4. Kamtuampau
aman leh amaanlo khenteltheihna zong ka ngah hi.
5. Mailam
ah thupiang ding thugenkhgolhtheihna zong hong kipia hi.
6. Cinate
thu ka ngetsak ciang in adamdingte zong hong telthei sak hi.
Hih
thupiangte hang in Lungnopna lianpi Topa kiang pan in ka ngah hi.
Thusuak tawh Letsikan Bual paina:
U Vungh Khan Thang in Letsikan Bual pai
ding cih Thusuak hong ngah a, ka Pa tawh mi 3 ka pai uhi. Khuazin madeuh in ka
tunphet un, U Thang in Khadai kaihna hong nei pah hi. A Zan sung in Zingciang
gamtatna ding teng Topa'n lak hi.
1.
Khuavak ciang in Topa' makaihna tawh ka vapai uh-a, mun
khat ka tunciangun Singkung khat hong kawi vanvan mawk a, Nuammah si-ung maw,
Topa ci in Pasian min phat hi. Tua a singkung kawi pen Vision ah amuh Sing
namtui na hi mawk hi. Tua mun pan Singmantui kung pona mun teng hong paisak
kawikawi hi. Tuateng ka manciangun ciah vingveng in khat vei ka kuankik pah
uhi. Singkungte vaphuk in Tongkhat ta in tan in Tan 3 bang ka ngah ciang un Lei
sung ah ka phuum uhi. Tua Zan amang sung ah theihsakna om leuleu a, hih
Singphumte pen tuzawh Kum 7 ciang Motor in hong lading hi cih thu ngah hi.
Tuakhitciangin Inn ah ka ciah uhi. Gam endin kapaikikma uh 1987 January 2nd
week in ka Pa un hong nusia ta hi.
Kum 7 hong cin ciang in Mawlaih lam pan
Motor lam hong kihong in Letsikan ciang bek hilo Sawbua dong Motor Lampi kibawl
in a thusuak gen teng pen hong tangtung takpi mawk hi. 1991 Kum ciangin ka Singphumte uh en ding in
ka pai leuleu uh-a, Thusim a hongtheihsakte in Singgai sa in na lamang in
Thailand gam dong ah na puak in na zuaksak uh cih ka nungphawk uhi.
2.
Sing hong kilaksak gai cih ka theihkhitciangun agamvahna
pan Thusuak khat hong ngah leuleu a, Letsikan Bual kiim mah ah avakna pan in
Huih Namtui mahmah khat azakphet in alungsim pen nosuah in Naupangnote lungsim
puak bangin Lungsim hatsak, Lungsim nosuah sak hi. Tua sung mahin Topa kiang
pan angah thu in: "Hih Sing pen manpha mahmah a, kong lah masak sang in
nakpi tak in manpha zaw hi" ci hi. Tua Sing pen ka zon uh hang in ki mu
zolo hi. Azanciangin Ka U Khan Thang pen Pasian tawh hong kiho in ah: Hih Sing
namtui azaksakna pen Lungdamkohna, Leitungmite in Pasian tung ah Lungdam akohna
Lathak hong sa hi. Azom mite in zong ama' kam tungtawn in Pasian aphatna hong
gingkhia leuleu hi. Tua zom ah dawite in zong Pasian aphatna hong ging leuleu
hi. Tua laitak pen adangte in Pasian aphatna tawh kibanglo in Uun in lauhuai a,
lipkhap huai mahmah hi. Tuakhitciang Khuabaite hamcihtak in hong haam in tuate
in zong Pasian phatna La asahi cih thu hong gen hi. Hih thuteng ka tel mateng
in amah a ihmu phial zong in ihmut san ngamlo in Nipi khat sung tawntung a
omdan encik in ka vilden hi.
3.
Letsikan Bual sung aa om a muhte:
* Letsikan Bual sung pen dawl/thuap 7 pha cih mu in genkhia
hi.
1.
Dawl khatna pen Galkap San 1 in cing cih mu hi.
2.
Dawl nihna pen galkap San 2 mah in cing cih mu
hi.
3.
Dawl thumna zong San 3 mah in cing cih mu hi.
4.
Tuadan mah in Dawl 7 kicing a, Dawl 7na ah a
Mangte om cih mu hi.
5.
Adawl nuainung pen ah Japan gal lai a, van
manphate, Thau, Sum,
Saiha leh Suangmanpha, Kham leh Ngun pawl
khat om cih mu hi.
Tua Bual kiim Suang sung ah zong Suang
manpha om cih mu hi.
Azanciangin Bualsung ah a omte thugenna a kam mah pan hong
paukhia a, " Bute hong ciah in cin na kiheem un cih thu om ahihman in ka
ciahsan pah vingveng uhi. Inn ka tunzawh asawtlo in Huihpi hong nunggawp a,
ciah kei mawk leng maw ka kicih san uhi.
Tuikhingzang Tunna: 1992 Kum ciang in Sawbua
pan Tuikhingzang ah gam en in ka pai uh-a, ka tu ni zan in mang lamdang khat ka
man hi. Ka mang in: Palikte, Galkapte, Lahwahkahte, Thannahpawngsong khualzin
ding in hong pai uh a, kei hong muh ciang un, Bok khatpa in "Hihpa Lule
hi, Kap lum un" hong cihciang in San 1 pa in hong kaplum in Thautang ma ah
avang siusiau zong ka muthei hi. Kei zong, "Ka mawhna bang mah omlo
ahihman in hong zo veve ding hi ing " ka cikik hi. Azingciangin Buk khat
ka lam uh a, ka zawhciang un Sawbua ah ka ciahkik uhi. Kithawi in vapai pah ni
ka kicih uhhang in ka ci hong na in kha kha sung bang hong sawt a, tua kikal in
ka U Khan Thang te innkuan na mapai uhi. Kei zong ka nopdeuh ciang in a Ni
Langte Innkuan, a Pa Do tawh Innkuan 3 pen Bawngleng 2 tawh ka va pai uhi.
Tuikhing ka tun nizan un, ka mang in: Amasa a, galkap thannah pawngsong ka
muhte hong ciahkik in galkapte in kei pen Salaam hong pia in kei zong Salaam ka
pia hi. Tua Ni akipan kei pen ka cidam pah in ka Kha zong suakta pah hi. Kha 1
sung tak dawite in hong man na hi gige a, tua sung in thu ka ngen zelzel hi.
Asawtlo in Lo kihawm a, Inn khat ciang Eka 6 ta mee sawk in kingah kimpah hi.
BCJC Pawlpi sung lutna: Tuikhingzang ka tun Kum un, Sia
Sang Neih Chung pen Mission sem in na om a, Pawlpi din ding hong genpihciang in
amau Innkuan ban ah
Ko
Unauteng leh Vial Za Kam tawh Inn 6 pha in BCJC Pawlpi thak khat ka phut uhi.
1993
Kum ciang in Pa Vial Za Kam tawh ka 2 un Evangelist ka siauh uhleh ka ngah uhi.
Amah
pen Aungzua ah koih in, Kei pen Dimzang ah hong koih uhi.
Dimzang
ah Mission Nasepna: 1993 Kum pan Dimzang ah Mission nasep vasem in,
1994 April kha in Dimzang Inn 8, member 40 tawh BCJC Pawlpi ka phut uhi.
Ad.1998 dong Mission ka sem suak a, 1996 ciangin Asistant Pastor Mamang hong
koihsak ciangun
Zonuamzang
ah Mission maban thak kipan ding in Evangelism malakna ka nei thei hi.
Zonuamzang
Mission nasepna: 1998 Feb 1 in Pawlpi Inn 4, Member 38 tawh BCJC Pawlpi
phuh khua nihna ahihi. Zonuamzang Church Pastor ding in hong kikoih suak pah
ahihman in 1999 March kha in Dimzang pan Zonuamzang ah Ka Innkuan un ka peem
uhi. Kum 2002 ciangin ah Church Pastor hihna taktak pen Khampat Assembly ah
hong pia uhi. 2005 Feb kha ciang Tuikhingzang pan ka tapa Thang Sian Mung leh a
Innkuan teng Zonuamzang ah ka pi a, tua kum mah in Dolluang Ohsuh Primary
School Bawlung kidemna Zonuamzang kitungsak a, ko Inn ah Taklaamte hong tung
sak uhi. Zonuamzang Hausapa Do Ngaih Lian kiang ah "Ko Inn ah hong tung
peuhpeuh in Bawlung akhatna ngah ding hi, ci'n ka gen a, Tuivial leh Taklam
Final kah takpi ahihman in thu ka ngetsak zel a, zinte zong thapia hanthawn in
tu'n piata vou ka ci hi. Atawpna ah goal 2:0 in Taklam in zo takpi mawk ahihman
in Siateng hong pai pah ngeingai in hong nohset uh-a, Lungdamko in Man kizaih
in nuam ka sa mahmah uhi. Tuazawh nungsang pen Hausate in Hunhon thungetna, ... Vaituamtuam ah hong hel
hi. A kumkikciangin Zangkual Tukpeng kidemna ah zong thungen ding mah in hong
seh uhi.
AD.2008 kum ciangin Ordain Pastor pen Tanbo Assembly ah
hong pia leuleu uhi.
AD.2009 in Zonuamzang Tuineek ding zong ding in Zozang khua
kung lam ah May kha sung in Tui golpi in luanglai akicihna mun ah Tui ending in
ka pai uh a, Tui na tawm mahmah ta hi. Hengvang khat bang bek in na om
ahihmanin avangsung ciang tawh ka holh leh tui hong luang ahihman in Haleluijah
cih ka awng hi.
Mang Lamdang: Zan ka mang sung ah, Galkapte hong pai
Thausim, Thau Hoih nei teh hong ci uhi. Nei keng ka cih hang in, Nei mah teh
hong cihteitei ciang un, Zong un ka cih leh zong takpi in Lukhamnuai ah mu uh
a, hong manpah in ka khut pen Sikkol tawh kilh in Thong kha khat kia ding in
degree khia uhi. Azingsang ciang in Hausapa kiang ah vapai in ka mang ka gen a,
amau zong mang na man in lamdang sa uhi. Tua mun pan Tui lak ding ka tehsukna
uh Tai 7 bang pha ahihban ah akikaal ah guam tampi om ahihman in Tui lak
nawnloh ding in ka khensat uhi. Tua Tui pen Tui Siangtholo, dawigilote om cih
thei ka hihman un Tuilak ding kisawm nawnlo hi. Thamlo in kha khat sung ka cina
a, bangmah semtheilo in ka om kawmkal ah Thu hong ngetsak un cin Thunget ka
cial zel hi. Hih thupiangte tung tawn in ka phawkthak thu in: Tui suahna
Hengvang sung ah mut in Haleluijah 3vei nakpi tak in ka ot pen dawite zakna ah
Kaabai Thauging bang in za cih ban ah Haleluijah icih pen Pasian Tate adingin
Letnet Hoih mahmah hi, cih ka phawk hi.
ZBCM
Pawlpi lutna: BCJC sung ah Kum 19 Pastor ka sep zawh Nipi Nitak khat
Mission Nasepna ding Pasian tung ah nakpi takin Thungetna ka neih uhleh azan ka
mang ciangin Pawlpimite in nop asakna mun ah suakta tak in ompih ding ka
lungsim sung ah thu hong suak hi. Koi Pawlpi hoih pen ding hiam cih ka ngaihsut
laitak un, Gospel hong kipai zel in, amasa pen UPC Pawlpi hong pai uh-a, ka
sangzo kei uhi. Anihna ah EBC Pawlpi hong lut uh-a, Pentecostal Upna sanglo
ahihman un ka sangzo kei uhi. A thumna ah Pawlpi thak khat ahi, Kha Pawlpite
Sia, Kham Suan Mung pen Tahan pan hong pai a, ki sang zolo hi. A 4na ah ZBCM
Pawlpi pan Gospel hong kipai a, Hun ka bawl ciang un, Praise & Worship, Kamtuam
Pau & Salan late hong sakpih uhciang in, Pawlpimite avek in thukimna leh
santheih kalsuan Upna mah tawh kituak ahihman in September 30, 2012 in ZBCM
Pawlpi ah akisiit omlo in kilut hi.
Nu
Niing Ngaih Vung damlohna leh hong nusiatna:
Angawng
thagui tung ah Cibawk om a, Zato kilak, Datman zaihsak in atlohphamawh
acihciangun a sathem lakhia in Mandalay Zatopi ah datkhuai ding in puaksuk
uhi. A result pen Cancer ci ahihman
in Madalay mah ah Datkeen ding in pai mengmeng un hong ci uhi. Kha 3 sung Zato lup ding, Kyats Tengh 50 bang
kigin kul ding cih thu hi-a, tuabang
natna neingeite kiang ah thupiangte akidotciang 100 ah khat bang dambek cih
hong kigenciang in Sum neihlohtawh kipaizolo hi. Thunget lawhcingte kiang ah
thu kingen sak hi. Thungente in Bumh hi hong cizel uh-a, Zato ah ka paiciang un
Cancer hi hong cizel ahihman un tua kikaal ah lungkham mahmah in ki om hi.
Ahizongin thungetna tawh pang in Zatui peuh zong nesak zel in ka om hang un
noptuam ciang bek hi'n damsuaklo in hong gim semsem a, thamlo in a meima
abawkna lam khitciang alangkhat lam ah hong kipan leuleu in nakpi tak hong bawk
in hong gim semsem hi. Sih ding bekbek lungsim ah om ahihman in Zato lam ah
kipai nawnlo in ama duh bangbang, Aktui, Aktak pia in ka kikhoi toto uhi. Hong
gim semsem ciangin, "Banggang ta leh Pasian tungah hong aap mai in, Nuntak
zawh ngap keng, ..." hong cihciangin Pawlpi Upate sam in Pasian tungah
aapna ka nei uhi. Hong gim semsem ahihman-in thu kivaikhak nop teng zong hong
vaikhak in "Natdawn Zatui" zing leh nitak in sun in ka kikhoita uhi.
Zatui sut March - July, 2012 Kha 5 sung pen Ka Makpa Kham Tual Pau in limtak
hong sut sak in tua sungin abeikhempeuh hong sik uhi. 2012 August - December
dong pen Ka Nuphalpa Dongh Ngaih Lian in Zatui sut Kha 5 sung mah Zing leh Nitak Tavuan hong lak
sak hi. Ka Lawmnu nat sung in Pasian in Thupha hong pia mahmah in Aksa, Moh,
Cikhum, Bawngnawi, akisap hunhun in acinat sung khempeuh Khual-le-tual pan hong
kiveh a, bangmah kitangsapna omlo in Topa in hong kisik sak hi. 2012 December
12 pan hong gimsem ahihman in Sanggamte zong hong giak ciat uhi. December 13
Nitak Nai 3PM in hong nusia hi.
Amah pen Ni 2 kikoih in Khual-le-Tual ah sap ding khempeuh
kizasak in Lailo, Tedim, Sawbua, Dimzang, Tuikhingzang, Kalaymyo &
Naypyidaw pan hong kiphaciat hi. Sivuisak dingin KZBA pan Mission Rev. Pau Do
Hau leh Khangno Lasa pawl zong hong pai a, Letpanchiang aa ZBCM pawlpite Mi 20
val zong hong pai ciat uhi. Innteek in Bawng khat go in mipite anneekpihna
kinei a, Zonuamzang lailo kipawlna pan in Dolsing haankuang ding hong kibawlsak
a, kipawlna min mah tawh sihgaalna Ks.10000 hong pia uhi. Lailo kipawlna mah
pan Zindopihna Tengh 1 man Vok go in Pa Thawng Ngaih Thang te Inn ah anpiakna
tavuan hong laaksak uhi. USA aa om Pa Khup Suan Thang leh Niang Khan Suan te
Innkuan in Sihgalna ding Ks.50000 leh a Pa Zam Za Do siatvehna in Ks.30000 hong
khak uhi. Makpa Kham Tual Pau in Taih Haan hoihtak hong bawl sak a, asanggamte
ahi Norway pan leh Australia pan akigawm in Ks.50000 mah hong khak uhi. Zangsung
Beh kipawlna pan zong Tul 10000 mah hong pia uhi. Sihgalna Sum kingah khempeuh
Sumtang in Ks.476,000 kingah hi. Zongeina tawh kihehnepna ahi "Sawm"
pen Nipi Kaalkhat sung Inn dim phitphet in hong giak uhi. Sawmkhak Ni in Sutpi
pen Aizawl pan a lawmte tawh hong tung uhi.
Suan-le-khakteng:
1.
Thang Sian Mung + Tin Khua Neih, Hlam Hau Beh (Thawng Ngul, Sebawk Khua)
1.
Thawng Za Cin Sut Malaysia
2.
Hang Khan Khual Tan
9, Letpanchaung
3.
Kap Sian Cin Lian Thang Tan
7, Zonuamzang
4.
Do Sian Pau Tan 3, Zonuamzang
5.
Gin Kim Tuang Tan
2, Zonuamzang
2.
Dongh Za Kap + Suan Ngaih Kim, ? ? (Pyidawtha/Kalaymyo)
1.
Thawng Khan Lian
2.
Vung Sian Sang
3.
Lia. ?
3.
Suan Khan Gin + Niing Lam Cing, Buansing (Gin Khan Suan, Lailo/Zonuamzang)
1.
Vung Sian Kem Tan
4, Zonuamzang
2.
Thawng Lam Muang Tan 2, Zonuamzang
3.
Zam lam Vung Tan
lang,Zonuamzang
4.
Cing San Nuam Mucu
5.
Suan Ho Neem Nawinelai
4.
Ciang Sian Cing + Langh tung Thang, Naulak (Sian Khan Suan, Dimzang Khua)
1.
Cing Sian Hoih kim Nawi nelai
5.
Thang Deih Thawn Malaysia
6.
Cing Nuam Lian + Kham Tual Pau, Mangzong (Kham Thawng,
Thuklai/Zonuamzang)
1.
Thawng Tun Mung Mucu
2.
Mang Tawi Cing Mucu
3.
Vung Lam Lun Nawi
nelai
7.
Cing Sian Huai Malaysia
8.
Suum Ngaih Cing + Mang Lian Thawng, Sihsing (Lai
Suum, Zonuamzang)
1.
Cung Neih Mawi Kum
2
2.
Vung Deih Kim Nawi
nelai
Lungdamkohna:
Kum 69 sung tawntung lauhuaina pan hong kem den a, cidamtak in hong kalsuanpih
TOPA PASIAN tung ah Lungdamna ka ko hi. Hih Lai hong gelhsak a Ni Dim tapa
Mangpu tung ah zong nakpi tak in ka lungdam hi. Topa Pasian in Thupha hong
piaksak ta hen.
7th , 8th July, 2014
Rev. Khai Thawng, ZBCM, Zonuamzang
No comments:
Post a Comment